ممبئی :بالی وڈ اداکار سشانت سنگھ راجپوت خودکشی کیس میں جمعہ کو اداکارہ ریا چکرورتی انفورسمنٹ ڈائریکٹوریٹ (ای ڈی) کے سامنے پیش ہو ئیں ۔ ریا سے کئی گھنٹے سے پوچھ گچھ کی جارہی ہے۔ ریا کے والد اور بھائی بھی ای ڈی آفس میں موجود ہیں۔
بتادیں کہ اس سے قبل ریا نے ای ڈی سے اپیل کی تھی کہ سپریم کورٹ میں ان کی درخواست کی سماعت ہونے تک منی لانڈرنگ میں انکا بیان درج نہیں کیا جائے ۔ ای ڈی نے چکرورتی کے خلاف منی لانڈرنگ کا مقدمہ درج کیا ہے۔
چکرورتی کے وکیل ستیش مان شندے نے کہا کہ اداکارہ کورٹ میں ان کی درخواست کی سماعت ہونے تک ای ڈی کے سامنے پیش نہیں ہوں گی، لیکن ای ڈی نے ریا کی اپیل کو ٹھکراتے ہوئے جمعہ کو انہیں پیش ہونے کے لئے کہا۔
راجپوت کے والد کے کے سنگھ نے پٹنہ پولیس میں چکرورتی اور اس کے کچھ رشتہ داروں کے خلاف 25 جولائی شکایت درج کروائی تھی اور ان پر دھوکہ دہی کرنے اور اداکار کو خود کشی کے لئے اکسانے کا الزام لگا یا تھا ۔ سشانت سنگھ راجپوت (34) کے بینک اکاؤ نٹس میں مالی بے ضابطگیوں کا بھی الزام لگایا تھا۔ راجپوت کی لاش 14 جولائی کو مضافاتی علاقے باندرا میں واقع ان کی رہائش گاہ پر پنکھے سے لٹکی ہوئی ملی تھی۔ اس شکایت کی بنیاد پر ، پٹنہ پولیس نے چکرورتی اور دیگر کے خلاف ایف آئی آر درج کی تھی ۔