نیشنل ڈیسک : ہر ماں باپ کی خواہش ہوتی ہے کہ ان کے بچے بڑھاپے میں انکا سہارا بنیں لیکن آج کے وقت میں بہت کم ایسے بچے ہیں جو اپنے ماں باپ کا خیال رکھ پاتے ہیں ۔ اسی درمیان مغربی بنگال کے ہگلی کے ایک نوجوان نے اپنی ماں کے لئے جو کرنے کی سوچی شاید ہی کوئی ایسا کرنے کی ہمت کرے ۔ 

دراصل ان دنوں گورو ادھیکاری نام کے ایک شخص کا فیس بک پوسٹ کافی وائرل ہورہا ہے ۔ جس میں اس نے اپنی ماں کیلئے ایک قابل شوہر کی تلاش کرنے کی بات لکھی ہے ۔ گورو نے اپنی ماں  کے ساتھ تصویر شیئر کرتے ہوئے لکھا کہ وہ میرے بارے میں سوچ رہی ہے لیکن مجھے بھی ان کے بارے میں سوچنا چاہئے ۔  میں اکثر گھر سے باہر رہتا ہوں تو ماں اکیلی پڑ جاتی ہے ۔ اکیلی اولاد کے طور پر میں چاہتا ہوں کہ ماں کی زندگی کے باقی دن بھی بہتر طریقے سے گزریں ، اس لئے میں اپنی ماں کیلئے ایک اچھا ساتھی چاہتا ہوں ۔ 
گورو نے پوسٹ میں لکھا کہ ہمیں روپے - پیسے ، زمین یا جائیداد کا کوئی لالچ نہیں ہے لیکن ماں کیلئے ہمسفر ہونے کی ایک شرط ضروری ہے کہ وہ خودکفیل  ہونا چاہئے ۔ ماں کو کتابیں پڑھنا اور میوزک پسند ہے لیکن کتابیں اور میوزیک ہمسفر کی جگہ نہیں لے سکتے ۔ وہ ماں کے اکیلے پن کو دور کرنے کیلئے ان کیلئے ہمسفر چاہتے ہیں جو سکھ دکھ میں ان کے ساتھ کھڑا رہ سکے ۔ گورو کا یہ پوسٹ کافی پسند کیا جارہا ہے ۔ لوگ ان کی سوچ کو سلام کررہے ہیں ۔