نیشنل ڈیسک: پنجاب کے شہر کھنہ سے دل دہلا دینے والا معاملہ سامنے آیا ہے جہاں ماں بیٹی کی جوڑی نوجوانوں کو شادی کا اور کینیڈا میں سیٹل کروانے کا جھانسہ دیتی تھیں اور کروڑوں روپے ٹھگ لیتی تھی۔ ملزم خاتون سکھدرشن کور اور اس کی بیٹی ہرپریت کور عرف ہیری جو کینیڈا میں رہتی ہے، نوجوانوں کو کینیڈا میں آباد ہونے کا خواب دکھاتی تھیں۔ اب تک پولیس کی تفتیش میں سات سے زائد نوجوانوں کو دھوکہ دینے کی تصدیق ہوئی ہے۔
ڈی ایس پی ہیمنت ملہوترا نے کہا کہ اس گینگ کا طریقہ بہت چالاک تھا۔ کینیڈا میں بیٹھی ہرپریت کور ویڈیو کال، سوشل میڈیا اور جعلی دستاویزات کا استعمال کرتے ہوئے نوجوانوں اور ان کے اہل خانہ سے رابطہ کرتی تھی۔ وہ ویڈیو کالز پر لڑکوں سے براہ راست بات کرتی تھی، ان کے گھر والوں سے بھی ملتی تھی اور یہ کہہ کر ان کا اعتماد جیتتی تھی کہ وہ کینیڈا میں ایک کامیاب بزنس وومن ہے۔
جب نوجوان اور ان کے گھر والوں کو پوری طرح یقین ہوجاتا تو ہرپریت کور اور اس کی ماں سکھدرشن کور شادی اور انہیں کینیڈا بھیجنےکے نام پر بھاری رقم لیتی تھیں۔ جعلی منگنی کے کاغذات اور جعلی ویزا دستاویزات بھی تیار کرائے جاتے تھے تاکہ کسی کو شک نہ ہو۔
اس دھوکہ دہی کا پردہ فاش اس وقت ہوا جب ہرپریت نے غلطی سے کسی نوجوان کو واٹس ایپ پر ایک ایسامیسج بھیجا، جس میں دوسرے نوجوان سے رقم بٹورنے کی بات چل رہی تھی۔ جب نوجوان کو میسج کی حقیقت کا پتہ چلا تو فراڈ کا انکشاف ہوا اور اس نے پولیس میں شکایت درج کرائی۔
پولیس نے معاملے کی تحقیقات شروع کی اور سکھدرشن کور، اس کے بیٹے من پریت سنگھ اور ان کے ساتھی اشوک کمار کو گرفتار کر لیا۔ کینیڈا میں مقیم مرکزی ملزم ہرپریت کور کے خلاف لک آوٹ سرکلر جاری کرنے کی کارروائی جاری ہے۔ پولیس جلد ہی اسے انٹرپول کی مدد سے گرفتار کرکے بھارت لانے کی کوشش کرے گی۔
پولیس نے ملزمان کے پاس سے ٹھگی میں استعمال ہونے والے جعلی دستاویزات، جعلی ویزا فارم اور رقم کے لین دین سے متعلق ثبوت برآمد کر لیے ہیں۔ فی الحال اس بات کی تفتیش جاری ہے کہ اس گینگ نے کتنے لوگوں کو نشانہ بنایا اور مجموعی طور پر کتنی رقم کی ٹھگی کی گئی۔