نئی دہلی: بھاجپا  رکن پارلیمنٹ  رمیش بدھڑی نے فساد متاثرہ علاقوں کے دورے پر پہنچے راہل گاندھی پر نشانہ لگاتے ہوئے کہا کہ کانگرس لیڈر کو پہلے تو یہ بتانا چاہئے کہ کورونا وائرس سے بری طرح متاثر اٹلی سے واپس آنے کے بعد انہوں نے اپنی جانچ کروائی تھی یا نہیں ۔

جنوبی دہلی سے بی جے پی کے رہنما بدھڑی نے پارلیمنٹ کے باہر میڈیا سے بات کرتے ہوئے کہا کہ  کورونا وائرس  متعدی بیماری ہے، ایسے میں راہل گاندھی کو لوگوں کے درمیان جانے سے پہلے اپنی پوری جانچ کروانی چاہئے تھی۔ بتا دیں کہ راہل گاندھی نے بدھ کو دہلی تشدد کے متاثرہ علاقوں کا دورہ کیا۔
بدھڑی نے کہا کہ راہل گاندھی حال میں اٹلی سے واپس آئے ہیں۔ میں نہیں جانتا کہ ایئر پورٹ پر ان کی جانچ ہوئی ہے یا نہیں۔ انہیں لوگوں کے درمیان جانے سے پہلے یہ بتانا چاہئے  کہ انہوں نے کورونا وائرس کی جانچ کروائی یا نہیں۔ لوگوں کی حفاظت کے لئے یہ ضروری ہے۔

ملک میں اب تک کورونا  وائرس کے 29 کیس سامنے آئے ہیں جن میں سے 16 اٹلی سے آئے سیاح شامل ہیں۔ وہیں کانگرس کی جانب سے ابھی کوئی بیان نہیں آیا ہے کہ راہل گاندھی حال میں کسی سفر پر تھے یا نہیں۔