نئی دہلی:مرکزی وزیر پیوش گوئل کے نوبل انعام یافتہ ابھیجیت بینرجی کے بارے میں دئے گئے بیان کے بعد مسٹر بینرجی کی حمایت میں اترے کانگرس لیڈر راہل گاندھی نے آج کہا کہ لاکھوں ہندوستانیوں کو ان کے کام پر فخر ہے ۔بھارتیہ جنتا پارٹی کے لیڈروں پر نشانہ لگاتے ہوئے مسٹر گاندھی نے ایک ٹویٹ میں کہا،مسٹر بینرجی ان متعصب لوگوں کی آنکھوں پر نفرت کا پردہ پڑا ہے اور انہیں اس بات کاعلم نہیں ہے کہ پیشہ ور کیسے ہوتے ہیں۔آپ دہائیوں تک سمجھاتے رہیے لیکن انہیں سمجھا نہیں پائیں گے۔آپ بے فکر رہیں لاکھوں لوگوں کو آپ پر فخر ہے ۔

مسٹر بینرجی نے ہفتے کو ایک خبررساں چینل سے کہا تھا کہ وزیر تجارت ان کی قابلیت اور اہلیت پر سوال اٹھارہے ہیں۔مرکزی وزیر تجارت مسٹر گوئل نے جمعہ کو مسٹر بینرجی کو نوبل انعام پانے کیلئے مبارکباد دی لیکن ساتھ ہی کہا کہ ان کا نظریہ پوری طرح بائیں بازو سے تحریک یافتہ ہے  اور ہندوستان کے لوگوں نے ان کے کام کو خارج کردیا ہے۔

مسٹر بینرجی نے لوک سبھا الیکشن سے پہلے کانگرس پارٹی کے منشور میں شامل انصاف کے سب سے بڑی منصوبے کو تیار کرنے میں کانگرس پارٹی کی حمایت کی تھی۔اس منصوبے کے تحت ملک کے سب سے غریب 20فیصد کنبوں کو سالانہ 20ہزار روپے دئیے  جانے کا وعدہ کیاگیا تھا۔ان انتخابات میں کانگرس نے زبردست شکست پائی۔

بھارتیہ جنتا پارٹی کی قیادت والی مرکزی حکومت کی مذمت کرنے والے مسٹر بینرجی نے حال ہی میں کہا تھا کہ ہندوستانی معیشت بحران کے دور سے گزر رہی ہے۔انہیں حال ہی میں اقتصادیات کیلئے نوبل انعام کیلئے منتخب کیاگیا ہے۔