ہزاری باغ:  کانگرس کے سابق صدر راہل گاندھی نے آج ہزاری باغ کے بڑکاگاوں میں انتخابی ریلی سے خطاب کیا۔اس دوران راہل گاندھی نے مرکزی حکومت پر حملہ کرتے ہوئے کہا کہ وزیر اعظم نریندر مودی ملک کی خواتین کی کیسی حفاظت کر رہے ہیں۔

راہل گاندھی نے رگھوور حکومت پر حملہ کرتے ہوئے کہا کہ پورے ہندوستان میں جھارکھنڈ کے وزیر اعلیٰ سے بدعنوان شخص نہیں ہے۔اس کے ساتھ ہی کہا کہ آج ہمارے ملک کی خواتین بلاخوف وخطر گھر سے نہیں نکل سکتیں۔انہوں نے کہا کہ ہم نے چھتیس گڑھ میں حکومت بنتے ہی ٹاٹا کمپنی سے زمین واپس لے کر کسانوں کو دے دی ،ہندوستان میں ایسا کبھی بی جے پی کی حکومت نے نہیں کیا، یہ ہم نے کر کے دکھایا ہے۔

وہیں کانگرس کے سابق صدر نے کہا کہ جھارکھنڈ میں اتحاد کی حکومت بنتے ہی کسانوں کو دھان کی قیمت 2500 روپے  ملے گی اور کسانوں کا قرض معاف کیا جائے گا۔ہماری حکومت بنتے ہی کسان کی زمین بغیر پنچایت کی اجازت کے نہیں لی جائے گی۔جو زمین تحویل بل ہم مدھیہ پردیش، چھتیس گڑھ، راجستھان میں لائے ہیں، وہی جھارکھنڈ کو بھی دیں گے۔انہوں نے کہا کہ حکومت بنتے ہی ہم جھارکھنڈ کے نوجوانوں کے لئے خالی پڑی سرکاری نوکریوں کو بھریں گے اور روزگار دیں گے۔