میلان/اٹلی : پنجاب کی بیٹی سمرن جیت کور نے اٹلی کے ضلع بریشیا میں مقامی پولیس (پولیس لوکل) میں شمولیت اختیار کر کے کمیونٹی کا سر فخر سے بلند کیا ہے۔ 20 سالہ سمرن جیت کور کا تعلق پنجاب کے ضلع ہوشیار پور کے گاوں بڑی میانی سے ہے اور وہ اپنے والد سکھ پال سنگھ اور والدہ راجندر کور کے ساتھ اٹلی کے بریشیا ضلع کے قصبہ گمبارا میں رہتی ہے۔ اس نے کہا کہ والدین کی دعاوں سے اسے پولیس میں نوکری ملی ہے۔

سمرن جیت کور کے والد سکھ پال سنگھ نے صحافی کو بتایا کہ ان کی ہونہار بیٹی 5 سال کی عمر میں اٹلی آئی، اس نے ابتدائی تعلیم یہیں حاصل کی۔ محنت اور لگن کی وجہ سے وہ اعلیٰ سطح پر تعلیم حاصل کرنے کے بعد آج اس مقام پر پہنچی ہے۔ یہ بات قابل ذکر ہے کہ جب اٹلی کے مختلف شہروں میں اس طرح کی سرکاری ملازمتوں کے لیے بھرتی کا آغاز ہوتا ہے تو بہت سے نوجوان لڑکے اور لڑکیاں اس نوکری کے لیے درخواستیں دیتے ہیں۔