نئی دہلی: وزیر اعظم نریندر مودی کل دیوالی منانے کے لئے جموں و کشمیر کے راجوری میں فوج کے جوانوں کے درمیان آرمی ہیڈکوارٹرز پہنچے تھے ۔ انہیں اچانک اپنے درمیان پا کر جوانوں میں کافی جوش و خروش دیکھا گیا۔انہوں نے جوانوں کو اپنے ہاتھوں سے مٹھائی کھلائی اور دیوالی کی مبارکباد دی۔اس کے ساتھ ہی ملک کی حفاظت میں اپنی ہمت دکھانے پر ہم وطنوں کی جانب سے اظہار تشکر کیا-اس کے بعد وزیر اعظم نے جوانوں کی بہادری کو یاد کرتے ہوئے پاکستان پر جم کر حملہ بولا۔
انہوں نے کہا کہ آزادی کے بعد پاکستان نے ہم سے کشمیر چھیننے کی کوشش کی، لیکن ہمارے فوجیوں نے اس کے منصوبوں کو کامیاب نہیں ہونے دیا۔وزیر اعظم مودی نے کہا کہ پاکستان نے غیر قانونی طور پر کشمیر کے ایک حصے پر قبضہ کر رکھا ہے، جس کی کسک میرے اندر ہے۔ پی ایم مودی نے اس دن کشمیر کا دورہ کیا جب فوج 'انفینٹری ڈے' منا رہی ہے۔
انہوں نے پیدل فوج کی بہادری کو یاد کرتے ہوئے کہا، "آزادی کے بعد جب دونوں ملک الگ ہوئے، تو ہم نے پاکستان سے کہا کہ وہ اپنی راہ چلے اور ہم اپنی راہ، لیکن پاکستان نے بھارت کی پیٹھ میں خنجر گھوپنے کی کوشش کی''۔
وزیر اعظم مودی نے مزید کہا، "انہوں نے کشمیر پر قبضے کے لئے سازش رچی، لیکن ہماری پیدل فوج نے پاکستان کے منصوبوں کو چکناچور کر دیا۔جموں و کشمیر آج بھارت کا حصہ ہے، لیکن کشمیر کا کچھ حصہ پاکستان کے پاس چلا گیا، جس کی کسک ہمارے دلوں میں ہے'۔