احمد آباد:جواہر لال نہرو یونیورسٹی میں پیش آئے پر تشدد واقعہ کی مخالفت میں یہاں احتجاجی مظاہرہ کر رہی کانگرس کی طلباء اکائی این ایس یو آئی اور بی جے پی کی طلباء اکائی اکھل بھارتیہ ودیارتھی پریشد (اے بی وی پی)کے کارکن آپس میں متصادم ہو گئے ۔
این ایس یو آئی کے کارکن جب پہلے سے طے شدہ پروگرام کے مطابق شہر کے پالڑی میں واقع پریشد کے دفتر کی گھیرا بندی کر کے احتجاج کے لئے جا رہے تھے تب ہی دونوں فریق آپس میں متصادم ہو گئے ۔ موقع پر پہلے سے ہی پولیس تعینات تھی ، اس کے باوجوداس دوران پتھر بازی بھی ہوئی ۔ طلباء نے لاٹھی ڈنڈوں سے بھی ایک دوسرے پر حملہ کیا۔ بی جے پی کے یو تھ ونگ کے صدر رتوج پٹیل نے کہا کہ دونوں فریقوں میں لڑائی جھگڑا ہو ا ہے اور وہ تشدد کی حمایت نہیں کرتے ۔
ادھر پریشد کے کارکنوں نے الزام عائد کیا کہ این ایس یو آئی کے لوگ چھری اور ڈنڈے لے کر مظاہرہ کرنے آئے تھے ۔ اس دوران این ایس یو آئی کے ایک کارکن نے بتایا کہ جب وہ احتجاج کرنے جا رہے تھے تب ہی انہیں پریشد کے لوگوں نے بھگا دیا ۔ پولیس کے ایک افسر نے بتایا کہ اب تک کسی کے زخمی ہونے یا پکڑ نے کی اطلاع نہیں ہے ۔