نیشنل ڈیسک: نیشنلسٹ کانگرس پارٹی (این سی پی )کے سیکرٹری جنرل دیوی پرساد ترپاٹھی کا جمعرات کی صبح 67 سال کی عمر میں انتقال ہو گیا۔وہ کافی دنوں سے کینسر میں مبتلا تھے۔ ترپاٹھی نے آج صبح تقریباً ًسوا 9 بجے یہاں اپنی رہائش گاہ پر آخری سانس لی۔ ان کی آخری رسومات کل جمعہ کو انجام دے جائیں گی ۔
ترپاٹھی کے خاندان میں بیوی اور تین بیٹے ہیں۔اتر پردیش کے سلطان پور میں پیدا ہوئے ترپاٹھی بائیں طلباء سیاست سے چمکے تھے اور جواہر لال نہرو یونیورسٹی کے طالب علم یونین کے صدر بھی تھے۔
ایمر جنسی کے دوران وہ جیل بھی گئے تھے۔ بعد میں وہ کانگرس میں شامل ہو گئے اور راجیو گاندھی کے مشیر ہو گئے۔بعد میں وہ شرد پوار کی قیادت میں این سی پی میں شامل ہو گئے تھے۔وہ راجیہ سبھا کے ایم پی رہے اور ایک میگزین تھنک ٹینک کے مدیر بھی رہے۔
این سی پی لیڈر سپریا سلے نے ٹویٹ کیا کہ ڈی پی ترپاٹھی جی کے انتقال سے کافی دکھی ہوں۔وہ این سی پی کے سیکرٹری جنرل اور ہم سب کے رہنما تھے۔سلے نے کہا کہ انہوں نے این سی پی کے قیام کے وقت سے ہمیں قیمتی مشاورت اور رہنمائی سے نوازا جسے ہم یاد رکھیں گے۔ بھگوان ان کی روح کو سکون دے ،میری ہمدردی ان کے خاندان کے ساتھ ہیں۔