نیشنل ڈیسک : اترپردیش کے شاملی ضلع کے آدرش منڈی تھانہ علاقے کے پاش علاقے  'پنجابی کالونی' میں عالمی شہرت یافتہ بھجن گلوکار اجے پاٹھک اور ان کی اہلیہ  و بیٹی کا گھر میں ہی گلا کاٹ کر قتل کردیا ۔  اجے پاٹھک کا ایک دس سالہ بیٹا بھی  گھر سے غائب تھا ، بیٹے کے اغوا کا خدشہ ظاہر کیا جارہا تھا ، حالانکہ بعد میں اس کی بھی لاش مل گئی  ۔و اردات پیر کی رات میں ہوئی جبکہ واردات کا پتہ منگل کی شام قریب چار بجے اس وقت لگا جب اطلاع پر ایس پی سمیت تمام اعلیٰ افسر موقع پر پہنچے ۔ 

پولیس سپرنٹنڈنٹ ونیت جائیسوال نے بتایا  منگل کے روز دوپہر تک اجے پاٹھک کے پریوار کا کوئی بھی ممبر دکھائی نہیں دیا تھا ۔ پاس میں رہنیو الے ان کے بھائی موبائل پر رابطہ کررہے تھے لیکن فون نہیں اٹھانے پر شام کے وقت پڑوسیوں اور اہل خانہ نے گھر میں جاکر دیکھا تو اہم دروازے کا چھوٹا گیٹ کھلا تھا ۔ پاٹھک کو آواز دینے پر جب کوئی نہیں آیا تو وہ لوگ اوپر گئے ، جہاں گیٹ پر تالا لگا ملا ۔ تالا توڑ کر دیکھا تو اندر اجے پاٹھک، اہلیہ اور بیٹی کی خون سے سنی ہوئی لاشیں پڑی تھیں ۔ قاتل گھر میں لگے سی سی ٹی وی کیمرے کی ڈی وی آر بھی اپنے ساتھ لے گیا ۔ ان کا دس سال کا بیٹا اور کار غائب ملی ۔ 

جائیسوال نے بتایا کہ واردات کی سنجیدگی کو دیکھتے ہوئے پولیس کی ٹیمیں چھان بین میں لگ گئی ہیں اور رات کو قتل کرنے والے پاٹھک کے قریبی رہے ہمانشو کو پانی پت (ہریانہ) سے گرفتار کرلیا ۔ گرفتار ملزم  نے بتایا کہ اس نے پیر کی آدھی رات کے وقت ہی پریوار کے تینوں ممبران کا تیز دھار ہتھیاروں قتل کردیا تھا اور اس  کے 10 سالہ بیٹے کا اغوا کر ان کی ہی کار سے پانی پت آگیا تھا ۔ بعد میں اس نے بیٹے کا بھی قتل کر اس کی لاش کو کار میں ڈال کر آگ لگا دی تھی ۔ پولیس نے کار سے جلی ہوئی حالت میں لاش کو برآمد کرلیا ۔ لاش کا پوسٹ مارٹم کرایا جارہا ہے ۔ 

انہوں نے مزید بتایا کہ سی سی ٹی وی فٹیج میں ہمانشو ہی گھر میں داخل ہوتا نظر آرہا ہے ، ہمانشو پہلے پاٹھک کے ساتھ ہی کام کرتا تھا ۔ ان کے گھر اس کا آنا - جانا تھا  اور کئی بار پریوار کے ساتھ کھانا بھی کھایاہے ۔ انہوں نے بتایا کہ گرفتار ملزم سے پوچھ تاچھ کی جارہی ہے اور دوپہر واردات کی تفصیل سے جانکاری دیں گے ۔