ممبئی: مہاراشٹر کی سیاست میں رات بھر چلے ڈرامائی واقعات کے بعد حکومت بنانے میں ناکام رہی شیو سینا سربراہ ادھو ٹھاکرے نے کہا ہے کہ یہ چھترپتی شیواجی مہاراج کی سرزمین پر سرجیکل  سٹرائیک  ہے  اور ریاست کی عوام اس کا کرارا جواب دے گی۔

ٹھاکرے نے این سی پی لیڈر شرد پوار کے ساتھ ہفتہ کو یہاں مشترکہ پریس کانفرنس میں کہا کہ ریاست میں یہ سیاسی ڈرامہ رات کے اندھیرے میں ہوا جو افسوسناک ہے۔ شیو سینا اندھیرے میں نہیں بلکہ جو بھی کرتی ہے، دن کی روشنی میں کرتی ہے۔انہوں نے بھارتیہ جنتا پارٹی کا نام لئے بغیر کہا، وہ توڑنے کا کام کرتے ہیں اور ہم جوڑنے کا کام کرتے ہیں۔ہریانہ اور کئی دیگر ریاستوں میں کس طرح سے جمہوریت کے ساتھ کھلواڑ ہوا ہے یہ پورے ملک نے دیکھا ہے۔

ٹھاکرے نے کہا کہ مہاراشٹر میں بھی اقتدار حاصل کرنے کے لئے جو کھیل کھیلا گیا ہے، اس کو بھی پورا ملک اور مہاراشٹر کی عوام دیکھ رہی ہے اورانہیں اس کے نتائج بھگتنے پڑیں گے ۔۔کانگرس لیڈر احمد پٹیل اور کے سی وینو گوپال کو بھی اس پریس کانفرنس میں شامل ہونا تھا لیکن آخری وقت میں اعلان کیا گیا کہ کانگرس مشترکہ پریس کانفرنس میں شامل نہیں ہوگی۔دریں اثنا، کانگرس نے بھی مہاراشٹر میں ہوئے واقعات کو  بدترین سیاست اور مینڈیٹ کے ساتھ دھوکہ قرار دیا ہے۔