نئی دہلی: دہلی کے وزیر اعلیٰ اروند کیجریوال نے کہا ہے کہ مرکزی وزیر داخلہ امت شاہ سے ملاقات کے دوران شہریت ترمیمی قانون( سی اے اے )کی مخالفت میں شاہین باغ میں چل رہے دھرنے مظاہرے کے معاملے پر کوئی بحث نہیں ہوئی ہے۔ دہلی کے وزیر اعلیٰ کا مسلسل تیسری بار عہدہ سنبھالنے کے بعد کیجریوال کی بدھ کو شاہ سے یہ پہلی ملاقات تھی۔
کیجریوال نے بعد میں ریاستی کابینہ کے اجلاس کے بعد پریس کانفرنس میں کہا شاہ کے ساتھ ملاقات اچھی رہی۔ انہوں نے کہا خوشگوار ماحول میں ملاقات ہوئی جس میں '' ہم نے مختلف مسائل پر تبادلہ خیال کیا۔ دونوں نے اس بات پر اتفاق کیا کہ دہلی کی ترقی کے لئے مرکز اور ریاستی حکومت کو مل کر کام کرنے کی ضرورت ہے اور ہم ساتھ مل کر کام کریں گے۔
وزیر اعلیٰ نے شاہین باغ کے مظاہرے کو لے کر پوچھے گئے سوال پر کہا کہ شاہ کے ساتھ اس مسئلے پر کوئی بات نہیں ہوئی۔ انہوں نے کہا، '' دہلی حکومت کے وزرائ، محکمہ سربراہان اور سیکرٹری کے ساتھ آج میٹنگ ہوئی جس میں انتخابی مہم کے دوران 'آپ ' حکومت کی جانب سے جاری کئے گئے ' گارنٹی کارڈ' کو کس قسم سے عمل میں لایا جا سکتا ہے، اس پرتفصیل سے تبادلہ خیال کیا گیا۔ متعلقہ محکموں کو ایک ہفتے کے اندر گارنٹی کارڈکو کس طرح لاگو کیا جانا ہے، اس کا منصوبہ تیار کرنے کے لئے ہدایات دی گئی ہیں۔