کولمبو: سری لنکا میں غیر متوقع سیلاب سے بے گھر ہونے والے لوگوں کے لیے ہنگامی امدادی سامان لے کر بھارتی فضائیہ کا طیارہ جمعہ دیر رات سری لنکا پہنچا۔ ضروری غذائی اشیاء اور صفائی ستھرائی سے متعلق سامان لے کر گیا سی130 طیارہ دیر رات تقریباً ڈیڑھ بجے کولمبو کے بھنڈارانائیکے بین الاقوامی ہوائی اڈے پہنچا، جہاں بھارتی ہائی کمیشن کے حکام اور سری لنکا فضائیہ کے حکام نے طیارے کا استقبال کیا۔ مشکل کی اس گھڑی میں سری لنکا کی مدد کے لیے بھارت نے جمعہ کو ’آپریشن ساگر بندھو‘ شروع کیا اور امدادی سامان کی پہلی کھیپ بھارتی نیوی کے طیارہ بردار جہاز آئی این ایس وکرت اور آئی این ایس ادیگری سے سری لنکا پہنچائی گئی۔
یہ امداد ایسے وقت میں موصول ہوئی ہے جب سری لنکا کے حکام نے کیلانی اور اٹانگل ندیوں میں بڑھتے پانی کی سطح کے باعث جمعہ کی رات سے ’ویسٹرن پروونس‘ میں ”غیر متوقع آفت کی صورتحال“ کی وارننگ دی۔ سمندری طوفان ’ڈٹوا‘ سے پیدا ہونے والے نقصان کی وجہ سے سری لنکا غیر متوقع آفت کا سامنا کر رہا ہے۔ اس کی وجہ سے سیلاب آئے اور زمین کھسکنے کے واقعات ہوئے اور بنیادی ڈھانچے کو وسیع نقصان پہنچا۔ ڈیزاسٹر مینجمنٹ سینٹر (DMC) نے ہفتہ کی صبح چھ بجے تک 69 افراد کی موت کی تصدیق کی ہے، جبکہ کم از کم 34 لوگ لاپتہ ہیں۔ ڈی ایم سی نے بتایا کہ اس کے علاوہ آفت سے 61,000 خاندانوں کے 2,00,000 سے زیادہ لوگ متاثر ہوئے ہیں۔ ’سنٹرل پروونس‘ کے کینڈی میں امدادی حکام نے کہا کہ ہلاک شدگان کی تعداد اس سے کہیں زیادہ ہو سکتی ہے، کیونکہ کینڈی ضلع میں ہی جمعہ کی دیر رات تک ہلاک شدگان کی تعداد 50 سے زیادہ ہو گئی تھی اور ابھی تک اس کی سرکاری تصدیق نہیں ہوئی۔
مڈل ماو¿نٹین ایریا کا بیڈولا ضلع بھی زمین کھسکنے سے شدید متاثر ہوا ہے، جہاں کئی لوگ لاپتہ ہیں اور 35 سے زیادہ افراد کی موت ہو چکی ہے۔ طوفان ’ڈٹوا‘ کی وجہ سے ہونے والی بارش کے سبب تمام بڑے تالابوں اور ندیوں میں پانی کی سطح بڑھ گئی ہے اور حکام نے لوگوں کو وارننگ دیتے ہوئے محفوظ مقام پر جانے کا کہا ہے۔ موسمیاتی بیورو نے کہا کہ 200 ملی میٹر سے زیادہ بارش ہونے کا امکان ہے، حالانکہ ’ڈٹوا‘ ہفتہ کی دیر رات تک جزیرے سے باہر چلا جائے گا۔ سری لنکا کے تقریباً 35 فیصد علاقوں میں جمعہ کی صبح سے بجلی نہیں ہے جس سے سرکاری بجلی کمپنی سیلون الیکٹریسٹی بورڈ کے تقریباً 70 لاکھ صارفین متاثر ہوئے ہیں۔ مسلسل بارش اور سیلاب کی وجہ سے بجلی بحال کرنے کے کام میں رکاوٹ آ رہی ہے۔