انبالہ : ہریانہ کے انبالہ سے ایک عجیب تصویر سامنے آئی ہے ۔ جس میں مسلم بستی میں گھروں کے باہر لگے پوسٹر پر لکھا ،' دروازہ کھلوانے کیلئے مودی - مودی چلائیں۔'چناوی ماحول میں بہت سے رنگ دیکھنے کو ملتے ہیں ۔ لیڈروں اور جماعتوں کی طرف سے ووٹروں کو لبھانے کیلئے ہر ممکن کوششیں کی جاتی ہیں اور تشہیر نئے نئے طریقے اپنائے جاتے ہیں لیکن ہریانہ اسمبلی انتخابات کے درمیان انبالہ سے یہ ایک عجیب تصویر سامنے آئی ہے ۔ 

یہاں ایک مسلم بستی میں گھروں کے باہر کچھ پوسٹر لگائے گئے ہیں ان پوسٹروں پرلکھا گیا ہے کہ یہاں کی گھنٹی (ڈور بیل) خراب ہے ۔ دروازہ کھلوانے کیلئے برائے مہربانی مودی - مودی چلائیں ۔ یہ واردات انبالہ چھاؤنی علاقے کی ایک مسلم بستی کی ہے ۔ یہ پوسٹر کیوں لگائے ہیں اس کے پیچے کی کہانی بیحد دلچسپ ہے ۔ 
مسلم بستی کے لوگوں نے بتایا کہ چناوی ماحول میں بہت سے امیدوار ان کے  پاس ووٹ کی اپیل کیلئے آتے ہیں ۔ اور وہ بار بار ڈور بیل بجاتے ہیں ۔ لہٰذا یہ پوسٹر انہیں امیدواروں کیلئے لگائے ہیں ۔ لوگوں کا کہنا ہے کہ تمام پارٹیوں کے لیڈران کے پاس ووٹ مانگنے آتے ہیں لیکن انہیں اپنی حمایت مودی کو دینی ہے اس لئے انہوں نے پوسٹر لگا دئیے ہیں کہ جو لیڈر مودی کا نام لیں گے انہیں کیلئے دروازہ کھولا جائے گا ۔ بتایا جارہا ہے کہ یہ نایاب پوسٹڑ مسلم خواتین کی اپیل پر لگائے گئے ہیں ۔