بیجنگ: چین میں کورونا وائرس کا قہر مسلسل جاری ہے۔ یہاں 45 اور لوگوں کی موت ہو گئی جس کے بعد اس وائرس سے مرنے والوں کی تعداد259 تک پہنچ گئی ہے۔ ہفتہ کو چین میں 11791 افراد میں انفیکشن کی تصدیق ہوئی ہے۔ بتا دیں کہ چین نے جمعہ شام تک9,692 معاملات کی تصدیق کی تھی جو تعداد اب بڑھ گئی ہے۔ وہیں گذشتہ دن پہلے عالمی ادارہ صحت نے چین کے کورونا وائرس کو بین الاقوامی ایمرجنسی قرار دے دیا۔
رپورٹ کے مطابق چین سے باہر 18 ممالک میں کورونا وائرس کے 82 معاملات کی تصدیق ہوئی ہے۔ تھائی لینڈ میں 14، جاپان میں 11، سنگاپور میں 10، جنوبی کوریا میں چار، آسٹریلیا اور ملائیشیا میں سات -سات، امریکہ اور فرانس میں پانچ پانچ، جرمنی اور متحدہ عرب امارات میں چار چار اور کینیڈا میں کورونا وائرس کے تین معاملا ت کی تصدیق ہوئی ہے۔ اس کے علاوہ ویت نام میں دو، کمبوڈیا، فلپائن، نیپال، سری لنکا، ہندوستان اور فن لینڈ میں ایک ایک کورونا وائرس کے کیس کی تصدیق ہوئی ہے۔
ووہان سے 324 ہندوستانی مسافروں کو لے کر ہندوستان پہنچا ایئر انڈیا کا طیارہ
کورونا وائرس کے قہر سے چین میں ہاہاکار مچی ہوئی ہے ۔یہاں رہنے والے دوسرے ملک کے شہری شہر چھوڑ کر اپنے ملک لوٹنا چاہ رہے ہیں۔اسی درمیان ہندوستان نے بھی اپنے شہریوں کی حفاظت کو ذہن میں رکھتے ہوئے انہیں ایئر لفٹ کرنے کا فیصلہ لیا۔ جس کی وجہ سے جمعہ کی دیر رات ایئر انڈیا کے خصوصی طیارے نے ووہان سے 324 ہندوستانی مسافروں کے پہلے جتھے کو وطن لانے کے لئے اڑان بھری تھی جو سنیچر کی صبح دہلی پہنچ گیا ہے۔