نئی دہلی: کانگرس نے کہا ہے کہ حکومت سے نئے سال پر لوگوں کے مسئلوں کو کم کرنے کیلئے پختہ قدم اٹھانے کی امید تھی لیکن اس نے ریلوے کا کرایہ اور رسوئی گیس سلنڈر کے دام بڑھاکران امیدوں پر پانی پھیرا ہے اور پارٹی اس کی مذمت کرتی ہے۔
خواتین کانگرس کی صدر اور پارٹی ترجمان سشمتا دیو نے بدھ کو یہاں کانگرس ہیڈکوارٹر میں نامہ نگاروں سے کہا کہ ریلوے کاکرایہ اور رسوئی گیس سلنڈر کے دام بڑھاکر حکومت نے عام لوگوں کے ساتھ ناانصافی کی ہے اور نئے سال پر عام لوگوں پر کیا گیا ظلم قابل مذمت ہے۔

انہوں نے کہا کہ نئے سال پر حکومت کو بے روزگاری سے متاثرلوگوں کا درد کم کرنے اور بدحال معیشت میں بہتری لانے کیلئے قدم اٹھانے چاہئے تھے لیکن اس نے سال کے پہلے دن ریلوے کا کرایہ اور ایل پی جی سلنڈر کے دام بڑھاکر عام آدمی کو گہرا دھکا دیا ہے۔یہ دھکا عام لوگوں کیلئے ناقابل برداشت ہے۔ایسا لگتاہے کہ حکومت بیروزگاری اور بدحال ہوتی معیشت میں بہتری لانے کے اقدامات کرنے کے بجائے لوگوں کو مزید بحران میں ڈالنے کا کام کرنے میں زیادہ دلچسپی لے رہی ہے۔

ترجمان نے کہا کہ ملک کے 2.30کروڑ لوگ ریلوے پرانحصار کرتے ہیں اور ان کا کرایہ بڑھاکر حکومت نے انہیں بے رحمی سے کچلنے کی کوشش کی ہے۔حکومت نے کرائے میں اضافہ ایسے موقع پر کیا ہے جب دیہی صارفین کی شرح گر گئی ہے۔سرکاری اعدادو شمار کے مطابق لوگوں کی خرید کی صلاحیت گرگئی ہے اور بے روزگاری 45سال کی سب سے اونچی سطح پر پہنچ گئی ہے۔