نیشنل ڈیسک:تیلنگانہ کے نظام آباد  سے بھارتیہ جنتا پارٹی (بی جے پی) کے  رکن  پارلیمنٹ  دھرم پوری  اروند نے آل انڈیا مجلس اتحادالمسلمین ( اے آئی ایم آئی  ایم )کے صدر اسد الدین اویسی کے  خلاف متنازعہ بیان دیا ہے۔بھاجپا  رکن پارلیمنٹ دھرم پوری اروند نے دھمکی بھرے لہجے میں کہا کہ ' میں تم کو(اسد الدین اویسی)انتباہ دیتا ہوں کہ میں کرین سے الٹا لٹکا کر تمہاری داڑھی  کاٹوںگا۔اس کے بعد میں تمہاری داڑھی کو تیلنگانہ کے وزیر اعلیٰ کو لگا کر اس کو پروموشن دوں گا۔

اس سے پہلے بھی دھرم پوری  اروند نے شہریت ترمیمی قانون کی مخالفت کرنے پر   اسد الدین اویسی کے خلاف متنازعہ بیان دیا تھا۔گزشتہ ماہ بی جے پی ممبر پارلیمنٹ نے کہا تھاکہ  اسد الدین اویسی شہریت ترمیمی قانون کو غیر آئینی اور فرقہ وارانہ بتا کر اس کی مخالفت کر رہے ہیں۔میں پوچھتا ہوں کہ کیا اویسی پاکستان اور بنگلہ دیش سے انتخاب لڑنا چاہتے ہیں؟  بی جے پی  لیڈر دھرم پوری  اروند نے کہا کہ اسد الدین اویسی مسلسل ملک کو تقسیم کرنے  والے بیان دے رہے ہیں۔

آپ کو بتا دیں کہ حیدرآباد سے ممبر پارلیمنٹ اسد الدین اویسی مسلسل شہریت ترمیمی  قانون کی مخالفت کر رہے ہیں۔انہوں نے پارلیمنٹ میں شہریت ترمیمی  قانون کا مسودہ بھی پھاڑ ڈالا تھا۔اسد الدین اویسی کا الزام ہے کہ شہریت ترمیمی قانون مسلمانوں کے خلاف ہے۔انہوں نے شہریت ترمیم قانون کو غیر آئینی قرار دیتے ہوئے اس کو سپریم کورٹ میں بھی چیلنج کیا ہے۔