بغداد : امریکہ نے ایران کے دوسرے سب سے طاقتور لیڈر جنرل قاسم سلیمانی کو ڈرون حملے میں مار گرانے کے ایک دن بعد سنیچر کے روز پھر ہوائی حملہ کر کے 6 لوگوں کو مار دیا ہے ۔ حملے میں تین لوگ شدید طور پر زخمی ہوگئے ہیں ۔ مارے گئے لوگ ایران حمایتی ملشیا حشدالشابی کے بتائے جارہے ہیں ۔ حشدالشابی ایران حمایتی پاپیولر موبلائزیشن فورسس کا دوسرا نام ہے ۔ بتایا جارہا ہے کہ یہ حملہ عراق کے دارالحکومت بغداد کے تاجی علاقے میں ہوا ۔
ذرائع نے بتایا کہ ملشیا کی تین میں سے دو گاڑیوں میں آگ کی لپٹیں دیکھی گئی ہیں ۔ انہوں نے کہا کہ ہوائی حملے میں ان گاڑیوں میں سوار 6 لوگ زندہ جل گئے ۔ یہ حملہ مقامی وقت کے مطابق قریب 1.12 بجے ہوا ۔
اس سے پہلے امریکہ نے جمعرات دیر رات عراق کے دارالحکومت بغداد میں ہوائی حملہ کرکے ایران کے تجربہ کار قدس فورس کے اہم میجر جنرل قاسم سلیمانی کو مار ڈالا تھا ۔ سلیمانی کا قافلہ بغداد ایئر پورٹ کی جانب بڑ رہا تھا ، اسی دوران امریکہ نے ہوائی حملہ کر دیا ۔ اس حملے میں ایرانی حمایتی پاپیولر موبلائزیشن فورس کے نائب کمانڈر ابو مہدی ال مہاندس بھی مارے گئے تھے ۔