ممبئی،: بالی وڈ اداکار اشوک کمار کی شبیہ اگرچہ ایک سدا بہار اداکار کی رہی ہے لیکن بہت کم لوگوں کو معلوم ہوگا کہ وہ فلم انڈسٹری کے پہلے ایسے اداکار رہے جنہوں نے اینٹی ہیرو کا کردار بھی ادا کیا تھا۔ گزشتہ صدی کے چالیس کی دہائی میں اداکاروں کی شبیہ روایتی اداکار کی ہوتی تھی جو رومانوی اور صاف ستھرے کردار کیا کرتے تھے ۔

 اشوک کمار فلم انڈسٹری کے پہلے ایسے اداکار رہے جنہوں نے اداکاروں کے روایتی  سٹائل کو توڑتے ہوئے فلم قسمت میں اینٹی ہیرو کا کردار ادا کیا تھا۔ہندی فلم انڈسٹری میں دادا مونی کے نام سے مشہور کمود کمار گنگولی عرف اشوک کمار کی پیدائش بہار کے بھاگلپور شہر میں 13 اکتوبر 1911 کو ایک درمیانے طبقے کے بنگالی خاندان میں ہوئی تھی۔ انہوں نے اپنی ابتدائی تعلیم کھندوا شہر اور گریجویشن الہٰ آباد یونیورسٹی سے مکمل کیا ۔

اشوک کمار نے 1936 میں بامبے ٹاکیز کی فلم'' جیون نیّا ''کے بطور اداکاراپنے فلمی سفر کا آغاز کیا۔ سال 1939 میں آئی فلم کنگن ، بندھن ، اور جھولا میں اشوک کمار نے لیلی چٹنس کے ساتھ کام کیا. ان فلموں میں ان کی کارکردگی کو ناظرین نے بہت پسند کیا۔