امرتسر:سکھوں کے سب سے  بڑی مذہبی تنظیم اکال تخت نے ملک میں چل رہے  شہریت  ترمیمی قانون ( سی اے اے )مخالف تحریک کو حمایت دینے کی بات کہی ہے۔ اکال تخت کے چیف  گیانی  ہرپریت سنگھ نے دہلی اقلیتی کمیشن کے چیف ظفر الاسلام خان کی قیادت میں ایک مسلم وفد سے ملاقات کے بعد کہا ہے کہ سکھ اپنے اصولوں کے ساتھ بندھے ہوئے ہیں، متاثرین کو انصاف دلانے میں ان کے ساتھ کھڑے ہیں۔

گیانی ہرپریت سنگھ نے کہا کہ اقلیتوں میں خوف اور عدم تحفظ کا ماحول ہے اور یہ ملک کے لئے ٹھیک نہیں ہے۔ اس کے ساتھ ہی انہوں نے وفد کو یہ بھی مشورہ دیا ہے کہ وہ ہندو رہنماؤ ں سے بھی اس معاملے پر بحث کریں۔ انہوں نے کہا کہ شہریوں کو ملنے والے حقوق برابر ہونے چاہئیں۔دہلی کے علاوہ پنجاب، اتر پردیش، ہریانہ اور کرناٹک کے مسلم رہنماؤں نے بھی سی اے اے  مخالف تحریک کے معاملے پر حمایت لینے کے لئے اکال تخت کے چیف سے ملاقات کی ہے۔

غور طلب ہے کہ اسی پنجاب کے امرتسر میں حال ہی میں ہوئی ایک ریلی میں شرومنی اکالی دل کے رہنما اور سابق وزیر اعلیٰ پرکاش سنگھ بادل نے کہا تھا کہ حکومت کو اقلیتوں کو ساتھ لے کر چلنا چاہئے۔ سی اے اے  کے معاملے پر اختلافات کے چلتے ہی شرومنی نے دہلی انتخابات بھی لڑنے سے انکار کر دیا تھا۔