نیشنل ڈیسک: کرناٹک کے مانڈیا کے شری رنگ پٹنا تعلقہ میں ایک نہر میں ڈوبنے سے تین لڑکیوں کی موت ہو گئی، جبکہ ایک دوسری لاپتہ ہے۔ پولیس نے اتوار کو یہ  جانکاری دی۔ پولیس نے بتایا کہ یہ واقعہ ہفتہ کی شام مانڈیا دکوپلو گاؤں میں پیش آیا اور مرنے والی لڑکیوں کی عمر 13 سے 14 سال کے درمیان تھی۔
افسران کے مطابق، چاروں لڑکیاں میسورو کے ایک مدرسے میں پڑھتی تھیں۔ پولیس کے مطابق، 15 افراد کا ایک گروپ یہاں سیر کے لیے آیا تھا، جن میں زیادہ تر طلبہ اور ایک استاد تھے، اسی دوران استاد سمیت ان میں سے چھ لوگ نہر کے تیز بہاؤ میں بہہ گئے۔
پولیس نے بتایا کہ بعد میں استاد سمیت دو لڑکیوں کو بچا لیا گیا۔ پولیس نے کہا کہ وسیع تلاشی مہم کے بعد تین لڑکیوں کی لاشیں برآمد کی گئیں، جبکہ ایک لڑکی ابھی بھی لاپتہ ہے۔ اس نے بتایا کہ امدادی ٹیمیں لاپتہ لڑکی کی تلاش میں مصروف ہیں۔